Dmirijiet

Id-dmirijiet tas-SEBĊ u tal-Eurosistema huma stabbiliti fit-Trattat li jistabbilixxi l-Komunità Ewropea. Dawn huma speċifikati fl-Istatut tas-Sistema Ewropea tal-Banek Ċentrali (SEBĊ) u tal-Bank Ċentrali Ewropew (BĊE). L-Istatut hu protokoll anness mat-Trattat.

It-test tat-Trattat jirreferi għas-‘SEBĊ’ iżjed milli għall-‘Eurosistema’. Dan ġie abbozzat fuq il-premessa li l-Istati Membri kollha tal-UE se jadottaw l-euro. Sakemm dan iseħħ, tkun l-Eurosistema li twettaq id-dmirijiet.

Għanijiet

“L-għan ewlieni tas-SEBĊ hu li żżomm l-istabbiltà tal-prezzijiet”.

U: “mingħajr preġudizzju għall-għan tal-istabbiltà tal-prezzijiet, is-SEBĊ għandha tappoġġa l-politika ekonomika ġenerali fil-Komunità bl-għan li tikkontribwixxi għall-kisba tal-għanijiet tal-Komunità kif stabbilit fl-Artikolu 2.” (Trattat (Artikolu 105 (1))

L-għanijiet tal-Unjoni (Artikolu 2 tat-Trattat dwar l-Unjoni Ewropea) huma livell għoli ta’ impjieg u ta’ żvilupp sostenibbli u mhux inflazzjonarju.

lura għall-bidu tal-paġna

Dmirijiet bażiċi

Skond it-Trattat li jistabbilixxi l-Komunità Ewropea (Artikolu 105.2), id-dmirijiet bażiċi huma

• id-definizzjoni u l-implimentazzjoni ta’ politika monetarja għaż-żona tal-euro;
• il-ġestjoni tal-operazzjonijiet tal-kambju barrani;
• iż-żamma u l-amministrazzjoni tar-riżervi barranin tal-pajjiżi taż-żona tal-euro (ara l-amministrazzjoni tal-portafolji);
• il-promozzjoni għat-tħaddim bla xkiel tas-sistemi ta’ pagamenti.

lura għall-bidu tal-paġna

Dmirijiet oħra

• Karti tal-flus: il-BĊE għandu d-dritt esklussiv li jawtorizza l-ħruġ tal-karti tal-flus ġewwa ż-żona tal-euro.
• Statistika: flimkien mal-BĊN, il-BĊE jiġbor l-informazzjoni statistika meħtieġa għat-twettiq tad-dmirijiet, jew mingħand l-awtoritajiet lokali jew direttament mingħand l-operaturi ekonomiċi.
• Stabbiltà u sorveljanza finanzjarja: is-sistema Ewropea tikkontribwixxi għat-tmexxija bla xkiel tal-politika segwita mill-awtoritajiet responsabbli, li m'għandhiex x’taqsam mas-sorveljanza prudenti tal-istituzzjonijiet ta’ kreditu u mal-istabbiltà tas-sistema finanzjarja.
• Kooperazzjoni Internazzjonali u Ewropea: il-BĊE jżomm relazzjonijiet ta’ ħidma ma’ istituzzjonijiet, korpi u fora rilevanti, kemm fi ħdan l-UE kif ukoll fuq livell internazzjonali, għal dak li għandu x'jaqsam mad-dmirijiet fdati f’idejn l-Eurosistema.

lura għall-bidu tal-paġna